Korut Keluwen, Korsel Kirim Beras, Wis Seduluran Temenan ta Iku?

Korea Utara dadi berita, iku wis biasa. Malah biasa buanget. Opo maneh Kim Jong Un, sing koyok koboi iko. Masio asline gak cocok blas nek dipacaki koboi. Isok-isok malah gaya rambute sing spektakuler gak ketok ketutup laken sing koyok blantik sapi iko. Korea Utara kangelan pangan, iku yo wis lumrah. Negarane mlarat. Nanging ngeyelan. Mergo duwe jimat. Jimate jenenge nuklir. Mergo iku Amerika igit-igit terus ket biyen. Lewat PBB, negara-negara Eropa kompak ngembargo Korea Utara. Opo ae diembargo, klebu bab pangan. Saiki, dina-dina iki, Korut kangelan pangan temenan. Rakyate keluwen gak iso mangan. Negarane saiki lagi gosong garing krono musim. Tanduran gak onok sing isok dipanen. Iku yo berita. Nanging mataun-taun Korut yo ngono iku beritane. Krono embargo PBB. Krono Korut ngeyel dadi negara nuklir. Pas iku, pas sik durung tau lungguh bareng ambek Donald Trump, mbahas crito nuklire. Saiki Korut kangelan pangan temenan krono lemah-lemahe gosong garing diterak musim. Berita gedene, Korsel sing tonggo dewe nanging dianggep musuh bebuyutan welas atine katene ngirim bahan pangan. Iki lho berita sing gak biasa Cak... Koyo sing dilaporno BBC, Korsel katene ngirim 50.000 ton beras nang Korut. Iki, kiriman iki, sumbangan sing nggarai trenyuh ati wong sak ndunyo. Sumbangan pangan ngene iki sak durunge gak pernah onok ket Korut diembargo PBB.

Kementerian Unifikasi Korsel jare BBC ngomong ngene, beras katene dikirimno sak cepete. Polahe kuluwen nang Korut wis mlebu babak kronis. Sakwise dikirim, Program Pangan Dunia PBB (WFP), sing oleh tugas ngawasi sumbangan pangan iku.

Saking gosong garinge lemah-lemah Korut, Presiden China Xi Jinping uga Pemerintah Rusia dikabarno yo nawari Korsel bantuwan pangan.

China dikabarno nawari bantuan 100.000 ton pangan, Rusia 50.000 ton gandum. Nek sing iki dudu jare BBC nanging soko Newsweek.

Korsel, sik tas iki, krono hubungane ambek Korut wis lumayan apik, uga nyumbang US$ 8 juta. Sumbagan iki gawe program PBB sing nyediakno nutrisi ambek medis. Diutamakno gawe wong-wong wedok ambek cah-cah Korea Utara. Hemmm, kurang opo penake Kim Jong Un nek ngene iki. (idi)

Korut Keluwen, Korsel Kirim Beras, Wis Seduluran Temenan ta Iku?

Komentar

Berita Terbaru